Meteza hijoro ry Ambohitrimanjaka.
(Ry mpanao biriky, ry mpamboly vary!)
Ka ‘ndeha hotoherina tsy hahazo laka
‘Lay paika hanotofana “tany voajary”.
Ny vary ny antsika no foto-tsakafo.
(Manao bemarenina ny fitondrana ).
Ny vidin’ny vary efa lafo dia lafo,
Ka ‘ndeha hotoherina ilay fikasana.
Ny “tanamasoandron-dry zareo mpandrava”,
Tsy mety amintsika fa mety hahavalaka.
Isika efa zatra diavola-mazava,
K’aleo izy hitady tanety malalaka.
Izay “be no basy” ry Ambohitrimanjaka.
Voleo vary hatrany ny tanin’ny razana.
Isika vahoaka no tompon’ny laka,
Aza mety ho voavidy ka hisara-bazana!
DADAN’i ZINA (18-9-19)
