Helisoa
Ny sabotsy teo sy omaly alatsinainy no nanangona vola anampiana ireo voafonja miisa 12 mianadahy, voasambotra tamin’ny 20 febroary 2021 lasa teo ny Vehivavy Tiako i Madagasikara (TIM), tetsy amin’ny QG Bel’Air Ampandrana.
Nandritra izany vola mitentina 1861000 Ar no voaangon’izy ireo, avy amin’ireo malalatanana eto an-toerana, sy avy any ivelany nahitana: ny Erikerika Madagasikara any Frantsa, olon-tsotra tsara sitrapo avy any Frantsa, sy avy atsy amin’ny Nosy La Réunion koa.
Natolotra mivantana ho an’ny fianakavian’ireo voafonja ny vola voaangon’ny vehivavy TIM rehetra hatramin’ny 3 ora hariva teo omaly, ka nahatratra 150000 Ariary na 750000 fmg avy, isaky ny fianakaviana no nozaraina tamin’izany. Mbola mitohy hatrany ny ezaka hitsinjovana azy ireo, ka ny 8 martsa ho avy izao indray, andron’ny vehivavy no hanolorana izay ho voaangona rehetra.
Nanatrika ny fotoana ny birao politikan’ny antoko TIM, notarihin’ny Sekretera jeneraly, Riana Randriamasinoro, nahitana ny mpandrindra nasionaly: Jean Claude Rakotonirina ary ny mpikambana amin’ny birao politikan’ny antoko: Julien Andriamorasata.
