Isambilo
Anisan’ny lasibatry ny rivodoza Freddy izay niverina taty amintsika, rehefa avy namely ny tany Mozambika, ny any amin’ny faritra Atsimo Andrefana, ao anatin’izany i Toliara, renivohitry ny faritra. Na tsy nandalo tao amin’ny renivohitry ny faritra aza ny ivon’ity rivodoza ity dia namela takaitra tany an-toerana izy, teo amin’ny lafiny foto-drafitrasa sy trano fonenan’ny olona, miakatra koa ny rano any an-toerana, ka maro ireo traboina vokatr’izany, ireo mponina mipetraka amin’ ny faritra iva. Noho izay antony izay, traboina miisa 300 eo no noraisin’ny kolonely Rabe Jules, filohan’ny KMMR Toliara, an-tanana ny fanampiana sy ny fiahiana azy ireo.
Hoy indrindra izy mahakasika izany: ”noho ny fahabetsahan’ny vahoaka tra-boina eto Toliara renivohitry ny faritra Atsimo Andrefana, noho ny vokadratsy nateraky ny rivodoza FREDDY, dia olona tsy manan-kialofana tra-boina miisa 300 mahery no raisiko Kolonely Rabe Jules an-tanana ato amin’ny trano fonenako ato Anketa amin’izao fotoana izao. Fanampiana ara-tsakafo sy trano fialofana. Malagasy iray isika ka mila mifanampy indrindra amin’ny andro sarotra tahaka izao.”
