Ny Valosoa
Tamin’ny alatsinainy 18 marsa teo no nandrasana ny famoahan’ny fitsarana “Southpark Crown Court” ao Londres, mikasika ny didy sy ny sazy manameloka an’i Romy Voos Andrianarisoa, talen’ny kabinetran’i Andry Rajoelina teo aloha. Noho ny antony tsy voambara dia nahemotra amin’ny volana aprily ny fitsaràna ary amin’ny andro mbola tsy voafetra.
Tsiahivina fa tamin’ny 10 aogositra 2023, i Romy Voos Andrianarisoa izay talen’ny kabinetran’i Andry Rajoelina, mbola teo am-perinasa sy ilay mpiray tsikombakomba taminy Philippe Tabuteau, no voasambotra ary notazomina am-ponja tany Londres, rehefa tratra ambodiomby nitaky vola mitentina 261.000€ sy anjara 5% tamin’ny orinasa mpitrandraka vato Gemfields, takalon’ny fanomezana fazahoandalana hitrandraka eto Madagasikara.
Araka ny lalàna anglisy momba ny koliloly voafaritra ao amin’ny “Bribery Act (2010)” dia mety ho voasazy an-tranomaizina hatrany amin’ny 10 taona ity talen’ny kabinetran’i Andry Rajoelina teo aloha ity. Andrasana amin’ny volana aprily ho avy izao ny tohin’ny tantara.
