Vahoaka sy ny filoha Marc Ravalomanana – Sabotsy mifankahita, hangorom-potsy Mahamasina
Helisoa
Taorian’ny tany Toamasina nanakatonana ny fankalazàna ny faha–15 taona ny antoko Tiako i Madagasikara (TIM), tany an-toerana ny faran’ny herinandro teo dia ho vory lanona ao amin’ny kianjaben’i Mahamasina indray ny sabotsy 25 aogositra ho avy izao manomboka amin’ny 10 ora maraina ny vahoaka tsy ankanavaka mpomba an’i Dada. Fihaonambe hanamafisan’ny filoha Marc Ravalomanana ny maha–kandida filohampirenena azy ny fotoana amin’io, ao anatin’ny famaranana ihany koa ny fankalazana ny faha-15 taonan’ny antoko TIM eto an-drenivohitra.
Ela no niandrasana izao fotoana izao ny rehetra, tsy misy intsony ny sakana satria efa azo ny fahazoandalana avy any amin’ny prefektora sy ny kaominina Antananarivo renivohitra (CU).
Koa ho avy hirodorodo ho eny amin’ny kianjaben’i Mahamasina avokoa ny vahoaka tsy ankanavaka amin’io fotoana io.
Hangorom-potsy tanteraka i Mahamasina amin’io fotoana io, koa dia sabotsy mifankahita e!
