Nangonin’i Helisoa
Manambara ireo “stations services” na toby mpitsinjara solika fa tsy tompon’antoka amin’ny fanaovana solika hosoka na solika mitapoka izy ireo.
Araka ny fanambaran’izy ireo: “manoloana ny tranga mikasika ny raharaha solika hosoka eto Toamasina ka nampidirana am- ponja vonjimaika ny tompon’andraikitra eo anivon’ny « stations-services » sasantsasany, izahay mpitantana « stations-services » rehetra eto Toamasina dia manao izao fanambarana izao :
Tsy tompon’antoka velively ao anatin’ny fanaovana solika hosoka ny «stations-services » izaytantananay;
Ny stations-services dia manao « commande» ary mividy solika amin’ny « Compagnies Petrolières ». Rehefa tonga ny solika dia tsy maintsy manaraka ny « procédures de dépotage » apetraky ny OMH sy ny « Compagnies Petrolières » izahay ary manao ny fitsirihana sy ny fanarahamaso rehetra mikasika ny fatra sy ny kalitao araka ny fenitra tokony ho izy.
Mandritra ny fanarahamaso izay ataon’ny « stations-services », no hijerevana ny « numéros de scellées » mifanaraka amin’ny « bon de livraison », ny fatra araka ny « commande » natao, ary indrindra fa ny kalitao araka ny fenitra tokony ho izy, amin’ny alalan’ny fitaovana fitsirihana kalitao nomena ny stations (Thermo-densimètre) ;
Manao ny asanay aradalana izahay : maninjara solika mahafeno ny fenitra ivarotana azy araka ny fatra ilain’ny mpanjifa, tsy afaka mandà na manao « refus de vente » izahay, ka tsy tompon’andraikitra velively amin’izay rehetra ampiasain’ ny mpanjifa ny solika novidiany,
Noho ny toedraharaha misy amin’izao fotoana izao anefa dia maneho ny ahiahinay izahay mpitantana « stations-services » rehetra sy ny mpiara miasa eny amin’ny « stations », noho ny endrikendrika tsy ara-drariny izay atao aminay mandritra ny fanatanterahana ny asa;
Araka izany dia mangataka ny fitondra-panjakana mahefa isantsokajiny izahay mba hanao ny fanadihadihana lalina mahakasika ny fanaovana solika hosoka eto Toamasina.
Raha misy kosa anefa « stations-services » tafiditra ao anatin’ny fanaovana solika hosoka dia mangataka ny hampiharana aminy ny lalàna, mba tsy hananan’ ny mpanjifa ahiahy momba ny
kalitaon’ny solika tsinjaraina ety amin’ny « stations-services ».”
Efa maro ireo mpitantana Tobin-tsolika anyo Toamasina no natao famotorana ary Mpitantana Tobin-tsolika miisa 2 no efa naiditra amponja vonjimaika amin’izao fotoana izao. Manahy amin’ny mety hisian’ny fanakatonana ny Tobin-tsolika araka izany ireo mpitantana Tobin-tsolika any Toamasina. Anisan’ny fangatahan’izy ireo ny hampitoviana ny fitaovana fitiliana solika amin’ny OMH. Betsaka rahateo hoy izy ireo ny Orinasa mampiasa solika fandrehitra izay mampanahy.
