Mandry ve ny sainareo ry izy sivy nantenaina ?
Toa tsy nandrenesam-peo ka mahakivikivy saina !
Tsy nampoizina ny didy sy ny tianareo hampiharina .
Moa `nareo efa voavidy ka nandao ny lala-marina ?
Moa mahery ny devoly dia nandroso fahalovana ?
Misy indray ny kolikoly dia ny ratsy no narovana ?
Valaketraka ny maro , be no maina sady reraka.
Moa `nareo tsy mahatsiaro ho tompon`antoka tanteraka ?
N`inona n`inona hambara , tsy milamina ny tany.
Koa mihevera ry mpitsara , misy andraikitrao izany .
Raha ianao natao hanirina no hampivandravandra indray,
Dia mandehana re mimpirina fa tsy `zay no andrasanay.
… Androany ianao mpitsara , ampitso handalo fitsarana.
Sahinay ny manambara f`io dia tsy azonao ialana.
Saino ihany izay hombana , mba tsy hisy fanenenana.
Ampiharo k`aza ovàna ny lalàna ho fanorenana.
DADAN`i ZINA (21-06-18)
